Монгол Улсын Засгийн газрын 2026 оны бодлого, зорилтоо танилцуулж, орон нутагтайгаа нэг чиглэл, нэг ойлголттой ажиллах зорилго бүхий Засгийн газрын гишүүд, аймаг, нийслэлийн ИТХ-ын дарга, Засаг дарга нарын нэгдсэн уулзалт /2025.01.15/-нд Төрийн ордонд боллоо.
Уулзалтын дараа Цахим хөгжил, инновац, харилцаа холбооны сайд Э.Батшугар аймаг нийслэлийн засаг дарга нартай “Цахимаар нэн тэргүүнд” гэрээг зурлаа.
Тэрээр: 2026 онд бид нэлээн амбицтай зорилгыг тавьж байна. Иймээс аймаг нийслэлийн засаг дарга нартай хийх гэрээгээ Цахим хөгжил, инновац, харилцаа холбооны яамны хувьд 2026 Монгол Улсын Засгийн газрын “Шинэ итгэл-Эрс шинэтгэл 2026-2030” буюу Монгол Улсыг хөгжүүлэх таван жилийн хөгжлийн хөтөлбөрийн чиглэл болоод Эдийн засгийн өсөлтийг иргэддээ хүргэх 300 хоногийн ажлын төлөвлөгөө түүнчлэн “Цахимаар нэн тэргүүнд” буюу “Digital first” бодлогын зөвлөмжийн хүрээнд ажлаа зангидан хийхээр төлөвлөж байгаагаас гадна гэрээндээ олон улсын цахим хөгжлийн индексийн үндсэн шалгууруудыг тусган ажиллаж байгаагаараа онцлог байна гэлээ.
“Цахимаар нэн тэргүүнд” гэрээнд нийслэл болоод 21 аймгийн онцлогт тааруулсан бодит ажлуудыг тусгагдаад байна. Дээрх гэрээ нь үнсдэн долоон бүлэгт хуваагдаж байна.
- Цахим хөгжил, мэдээлэл технологийг хөгжүүлэх дэд бүтцийн ажлууд болон хөрөнгө оруулалт
- “Цахим аймаг” харилцаа холбоо мэдээлэл технологийн салбарын бодлогын хэрэгжүүлэлтийг орон нутагт хэрэгжүүлэх, төрийн болон төрийн өмчит байгууллагуудын цахим шилжилтийг эрчимжүүлэх
- Төрийн цахим үйлчилгээ түүний дэд бүтцийг шинэ шатанд гаргах
- Төрийн албан хаагч, иргэдийн цахим ур чадварыг нэмэгдүүлэх буюу соён гэгээрүүлж сурталчлан таниулахтай холбоотой ажлууд
- Аймаг орон нутгийн засаг захиргаанаас үзүүлэх төрийн үйл ажиллагааны дэмжлэг
- Төр хувийн хэвшил, олон улсын донор байгууллагуудын хамтын ажиллагаа
- МУ -ын хэмжээнд аж ахуй нэгж байгууллага, иргэдийн цахим аюулгүй байдал буюу том зургаараа кибер аюулгүй байдлын асуудлыг гэрээндээ нарийвчлан тусгалаа.
Цахим хөгжил, инноваци, харилцаа холбооны яам болон аймаг, нийслэлийн засаг дарга нартай хамтран ажиллах “Цахимаар нэн тэргүүнд” гэрээ нь тухайн аймгийн онцлогт тохирсон бодит ажлуудтай үр дүнтэй гэрээ болно гэж Цахим хөгжил, инновац, харилцаа холбооны сайд Э.Батшугар онцоллоо.
