Цахим хөгжил, инновац, харилцаа холбооны сайд Ч.Номин өнөөдөр /2026.07.02/ “Silkroad Innovation Hub”-ийн үүсгэн байгуулагч, гүйцэтгэх захирал Ассет Абдуалиевыг хүлээн авч уулзлаа.
Уулзалтад Цахим хөгжил, инновац, харилцаа холбооны яамны Төрийн нарийн бичгийн дарга Б.Мягмарнаран, Дижитал шилжилт, инновацын бодлогын хэрэгжилтийг зохицуулах газрын дарга Д.Цэнгүүнжав, Мэдээлэл, технологийн үндэсний паркийн захирал Ж.Золзаяа нар байлцав.
Уулзалтын үеэр Монголын стартап экосистемийг олон улсын зах зээлтэй холбох, дотоодын инновацын чадавхыг нэмэгдүүлэх, хиймэл оюуны чиглэлээр хүний нөөц, технологийн шийдлийг хөгжүүлэх боломжийн талаар санал солилцлоо.
“Монгол залууст дэлхийн зах зээлд өрсөлдөх, АНУ-ын венчур сангуудаас хөрөнгө оруулалт татах өргөн боломж бий. Салбарын яамны зүгээс энэхүү экосистемийг бодлогоор дэмжиж ажиллана” гэдгийг сайд Ч.Номин онцоллоо.
Талууд цаашид дараах чиглэлүүдээр хамтын ажиллагааг өргөжүүлэхээр санал нэгдэв. Үүнд:
- Цахиурын хөндийд байрлах “Silkroad Innovation Hub”-ийн хөтөлбөрүүдэд хамрагдах Монголын стартапуудын тоог нэмэгдүүлэх, хиймэл оюуны чиглэлийн манлайлагчдыг бэлтгэх;
- “Silkroad Innovation Hub”-ийн санаачлан хэрэгжүүлдэг “TechCrunch Startup Battlefield” тэмцээнд Монголын стартапуудын оролцоог дэмжих;
Дотоодын аж ахуйн нэгжүүдэд хиймэл оюуны бодит шийдлүүдийг нэвтрүүлэхэд чиглэсэн тусгай хөтөлбөр хэрэгжүүлэх боломжийг судлах.
