Монгол Улсын Ерөнхийлөгч Ухнаагийн Хүрэлсүх цахим хөгжил, инновац, харилцаа холбооны салбарын төлөөлөлтэй уулзлаа. Уулзалтыг нээж Цахим хөгжил, инновац, харилцаа холбооны сайд Ч.Номин хэлсэн үгэндээ, “Бидний санал санаачилга, үйл ажиллагаанд бодлогын дэмжлэг үзүүлдэг эрхэм Ерөнхийлөгч танд салбарын хамт олны нэрийн өмнөөс болон хувиасаа чин сэтгэлийн талархал илэрхийлж, сайн сайхан бүхний дээдийг хүсэн ерөөе. Цахим хөгжил, инновац, харилцаа холбооны яамнаас дараах тэргүүлэх чиглэлд бодлого баримтлан ажиллаж байна. Үүнд: Түүнчлэн салбарын өнөөгийн ололт, амжилт бол шуудан, радио, өргөн нэвтрүүлэг, харилцаа холбоо, мэдээллийн болон сансрын технологийн чиглэлээр ажиллаж байсан үе үеийн удирдлага, албан хаагчид, инженер техникийн ажилтнууд болон өнөөдөр мөр зэрэгцэн хөдөлмөрлөж буй 21 мянган хүний хамтын хүчин зүтгэлийн үр дүн гэдгийг тэрбээр онцлон тэмдэглэлээ. Монгол Улсын Ерөнхийлөгч У.Хүрэлсүх эх орныхоо өнцөг булан бүрт ажиллаж, харилцаа холбоо, мэдээллийн технологийн дэвшил нэвтрүүлж, мэдлэг оюунд тулгуурласан “Цахим үндэстэн”-ийг цогцлоон хөгжүүлэх үйлсийн төлөө хүчин зүтгэж байгаа нийт хамт олонд талархал илэрхийлэв. Тэрбээр төрийн үйлчилгээг цахимжуулан иргэдэд илүү хүртээмжтэй, ил тод, түргэн шуурхай хүргэж, улс орныхоо нийгэм, эдийн засгийн хөгжилд улам их хувь нэмэр оруулахыг салбарынханд хүсэн ерөөлөө. Мөн төрийн тэргүүнээр сонгогдсоноосоо хойш хийсэн ажил, хэрэгжүүлж байгаа үндэсний хөдөлгөөн, хөтөлбөрийн явц, гадаад харилцаа, улс орны нийгэм, эдийн засгийн байдал зэргийн талаар товч танилцуулав. Энэхүү уулзалтын үеэр Монгол Улсын Ерөнхийлөгчийн зарлигаар Харилцаа холбоо, мэдээллийн технологийн салбарын Ахмадын нэгдсэн холбооны дарга Намсрайн Төмөрхүү, “Монголын цахилгаан холбоо” ХК-ийн Техник, технологийн ашиглалтын газрын Техникийн үйлчилгээний албаны дамжуулах байгууламжийн тасгийн инженер, Монгол Улсын зөвлөх инженер Цэрэнбатын Баасанхүү нарт Монгол Улсын “Гавьяат холбоочин” цол хүртээлээ. Түүнчлэн нэр бүхий эрхмүүдийг төрийн дээд одон, медалиар шагналаа.